Gogoratu beharra al dago Espainia dela Europako lehendabiziko Estatu Nazionala, eta gogoratu beharra, halaber, Estatu Nazional horrek lurralde jakin batzuetako irudia eta forma kulturalak hartu zituela bere identitate-zeinutzat, beste identitate-zeinuen kaltean ? Gure adintsuko nork identifikatzen zuen bere burua ikasle-garaiko eta unibertsitateko testuetan ? Ez dira garai zaharrei soilik dagozkien kontu hutsalak, arazoak bere horretan baitirau Espainiako gaur egungo egituraketa autonomikoan ere : ez dago katalana, galiziarra edo euskalduna izan beharrik galdetzeko Madriletik gorako nork identifikatzen duen bere burua hedabideek, oro har, ematen dioten identitate-irudiarekin. (...) Mendeetan sor-sor ari den deskulturalizazio etengabe baten zeinu garbi askoak dira, baina injustizia nabarmenenen erantzuleek (edo estaltzaileek) hartzen dute beti besteen eskabide eta eskubideak insolidariotzat jotzeko zeregin profetikoa.