Sor Maria de Jesus de Agreda Soriako eta XVII. mendeko moja bat izan zan. Berak idatzia da "Mística Ciudad de Dios" izeneko liburua, prosaz eta Ama Birjiñaren bizitza kontatuz.
Sor Justina Aldalur, berriz, beste moja bat degu, Aiako alaba eta gaur Orduñako Santa Klara Komentuan bizi dana. Onek, bertsotan jarri ditu Soriako mojaren liburuan esaten direnak, ez itzez itz, baiña bai "gauza aundiñak", berak dionez esateko.
Aren jaiotetxea dan Zialtzeta beserrira ere garai bateko kanta-paperak sartzen ziran, eta berak, gazte-denboran, moja joan aurretik, bertso sail oiek etxeko sukaldean kantatzen zituan jai-arratsaldeetan, gurasoak entzule zirala.
Ala, orduan bertsozaletu eta gero komentuan bertsogintzan asi. Sail asko moldatu ditu, eta batzuk plazaratu ere bai. Baiña onako au du danetan nagusia ; bearbada, iñoiz argitara atera dan saillik luzeena, 1532 bertso dituan ezkero.
Ordu onean betor gugana, beraz, euskal bertso-baratza oparoaren emaitz berri au.