Hondartza eta opor garaia, maleta eta aireportuena. Eta aireportuetan, duty free, autolaguntza liburuak. Zure autoestimua indartu hamar urratsetan, Erretzeari uzteko hogeita bost pauso miragarriak… Ez duzu Jose Mari Esparzaren (Tafalla 1951) Cien razones por las que dejé de ser español horien artean aurkituko, tituluak tankera horretako liburu bat iradokitzen badu ere. Gehiago baita askoz. Saiakera politikoa, historia liburua, anekdotarioa… “Agian hau nire bizitzaren sintesi politikoa da” azaldu du. Liburuaren arrakastari erreparatuta bizitza horrek interesgarria behar du irakurlearentzat. Urte erdi joan da argitaratu zenetik, eta bosgarren ediziora iritsi da honezkero.