Beste liburu bat Fernando Amezketarrari buruz? Horixe bera esan nuen nik, liburu hau egitea proposatu zidatenean. Baina gero, neure artean pentsatu nuen interesgarria izango litzatekeela molde berri bat bilatzea betiko pasadizoei. Horretan saiatu nintzen, eta hau duzue emaitza, Fernandoren heriotza amezketarra, berak eta bere lagun eta ez hain lagunek kontatua. Fernandok, izan ere, heriotza berezia izan behar zuen... Fernando bizirik dagoelako! Bai lagunok, gure hizkuntzak bizirik irauten duen artean, Euskal Herriko lehen bertsolaria ez da hilko. Beti izango da marrazkietako, filmetako eta liburuetako protagonista, Fernando Amezketarra figura guztiz modernoa baita, herri xehearen irudi, zapalduen mintzo, jauntxoen salatari. Fernando hori saiatu naiz islatzen, bere aroari eta bere inguruari buruz —kokotxa harro, seguru aski— bizi izan zen artzain, meatzari, mandatari... eta bertsolaria.