EAJ berriz ari omen zen indartzen eta antolatzen "Espainiako Iparraldean, Frantziako liderren pisua arintzen den bitartean". Irujo, Ajuriagerra, Beyris eta horiek bezalako izen batzuk aipatzen ziren, ordurako nik ongi ezagutzen nituenak. Azken urteetan Euskal Herrian euskal nazionalistek emandako hainbat pauso arretaz aztertzen ziren, izenak, tokiak eta beste hainbat xehetasun emanez. Xehetasun hauen fidarritasun-mailaz ere aritzen ziren, EAJn zeukaten infiltrazio-mailaz ari zirenean. Nik ezin dut baieztatu datuok zuzenak ziren, baina niretzat bederen, egiantza handia zeukaten ; izan ere, Beroiz nire lagunaren izena aipatzen zen. Zehatz esateko, bere izena agertzen zen Municheko 62ko bilerara EAJko ordezkari joan zirenen zerrendaren barruan. [...]