Afrikako kontakizun tradizionaletan bi gai aipatzen dira batez ere : batetik, arbasoek utzitako ondareari eta izadiko indarrei -inguratzen gaituzten izaki bizi guztiei- zor zaien errespetua eta leialtasuna, eta bestetik, mendebaldeko zibilizazioaren inbasioak bertako kulturarentzat dakarren mehatxua.
Afrikako literatur tradizioaren parte bat esploratzaile, misiolari eta laguntzaileei esker heldu da guregana ; beste bat, afrikarrek beraiek zabaldu dute, haien kulturak aterpe eman dien beste herriren bateko kulturarekin bat egitean (tradizio afrokubatarra, esate baterako) ; eta beste batek ipuin kontalariei esker iraun du bizirik.