Hitzaurrean esaten zaigunez, Homeroren inguruan ahozkotasunaren emari zabala nola bildu zen adierazi ostean, helendarren epika zaharrean agertzen den gizarte aristokratikoaren nondik-norakoak biltzen ditu egileak. Eta, inguruabar horretatik abiaturik, Akileo, Odiseo edo Hektor bezalako heroi indartsuen nortasun soziopolitikoan barreneratzen da, hunkiduraz beteriko uneak iristeko.
Liburu honek euskal kulturaren esparru txikian gehiegi landu ez den gaia dakarkigu. Homerorekin eta helendar zibilizazioarekin jartzen du harremanean irakurlea; guztiok geure baitan daramagun kultura zaharra jartzen du berriro –ikuspegia gaurkoturik, beti ere– irakurlearen begien aurrean. Horretarako, Homeroren hitzak ekarriko zaizkigu maiz zuzenean, pasarte epiko gogoangarri haien edertasunarekin gozaraziko dizkigu ezpainak.