"Nik ez dakit bertzek nola egiten dituzten kantuak, bainan eni segurik ederki gostatzen zaut batzuetan"
(Xalbador)
Lanak kostatu gabe egiten dakienak a ze suertea daukan! Ni bat nator Urepelgo harrigarriarekin: "Gosta gabe deus ez". Baina beste ditxo itxaropentu eta akuilariago bat erantsi behar zaio aurrekoari: Gustuko lekuan aldaparik ez. Eta jatekorik gozoena baino gustukoago nuen nik bertsoa. Horregatik, nekearen arrastork gabe ibili nintzen bertsoaren pentzean, hitz neurtuaren larrean, txerria ezkurrean edo astoa pagotxetan baino areago. Ez dakit zergati egiten duzuen barre? Zer du Txerrik bi animalia horiekin konparatzeak? Ardiak eta otsoak behar al dute, beti, protagonismoa? Edo zakurrak eta katuak? [...]