Nork ez du gogoratzen bere lehenengo aldia ? Nork ez ditu bizi edo imajinatu hamaika lehenengo aldi ? Euskal idazleen ipuin erotikoak liburuarekin ireki genuen kremailera 1998an, Durangoko azokan, eta sei urte bete direnean beste talde-liburu batekin gatoz. Gaia jarrita ari dira oraingoan idazleak, bertsolariak bezala. Igo oholtzara, lehenengo aldia duzu gaia, eta egin narrazio bat zeuk nahi duzun doinuan eta neurrian. Eta gauza polit askoak egin dituzte. Lehenengo aldi errealistak eta fantasiosoak, umoretsuak eta tragikoak, norberarenak eta inorenak..., ez ditugu antzeko bi aurkituko, nahiz eta baden hitz bat ipuinez ipuin erlea bezala saltoka dabilena : plazera. Idazleen izenak eta ipuinen tituluak irakurrita, nork ez du kili-kilia sentitzen ? Halako hazkuratxo bat halako lekuetan ? Kremailera zabaldu eta goazen barrura. Juan Martin Elexpuruk zuzentzen duen Literotura bilduma erotikorako zenbait euskal egileri euren lehen aldia gogora ekartzea eskatu zaie. Egileak Joxean Agirre, Aitor Arana, Itxaro Borda, Lander Garro, Sonia Gonzalez, Carmen Gisasola, Edorta Jimenez, Juan Ramon Madariaga, Diego Martiartu, Xabier Mendiguren E., Juan Karlos Merino, Paddy Rekalde eta Patxi Zubizarreta dira.