Kolore asko ditu munduak, bidaiaria berehala ohartzen da horretaz, bazter batetik bestera aldatu egiten baitira arrazak, hizkuntzak, ohiturak... eta horrek guztiak ederrago egiten du mundua.
Desberdintasun guztien gainetik, ordea, antzeko arazo eta desirak sumatzen dira han-hemen, sentimendu berak baitabiltza taupaka nonahiko gizon-emakumeon bihotzetan... eta horrek are ederrago egiten du gizadia.
Bere ibilaldi ugarietan ikusitako jendeak eta bizi izandako esperientziak erabili ditu Jon Arretxek, egoera eta pasadizo horiek ipuin bihurturik guri eskaintzeko. Pertsona alaiak zein tristeak ezagutu ahal izango dituzu orriotan, istorio hunkigarri edo arriskutsuak, eta horien bitartez hurbilago sentituko dituzu Afrika, Amerika nahiz Asiako herriak eta herritarrak. Zazpi kolore du izena liburu honek, zazpi direlako bertako kolore eta sentimenduak, ostadar berri baten gisan. Denen azpitik, berriz, bai penak bai pozak gozatzen dakien egile bat, bizitzaren lilura deskubritzen lagunduko dizuna. Ohi bezain arina eta atsegina da liburu honetan Arretxeren idazkera, baina, aldi berean, inoiz baino sakonago eta hunkigarriago kontatzen diguna. Aipatu beharrekoa da, halaber, liburu honek objektu bezala duen balioa eta edertasuna, maketazio berezia eta irudi ugari erantsi baitzaizkio, ez apaingarri huts baizik eta edukiari guztiz loturik. Cristina Fernandez Blanco artista gasteiztarrari zor zaio diseinu-lan guztia.