Ondarroako Udalak eta Elkar argitaletxeak antolatzen duten Augustin Zubikarai Nobela Laburrentzako Sariaren irabazle izan da aurten obra hau (Fernando Morillok idatzitako Gloria Mundi eleberriarekin erdibana). Pertsonaien psikologia ederki marrazten duen nobela da Burua txoriz beterik, bizitzaren zabala pintzelkada finez eta doiez erretratatzen asmatzen duena, giza harremanen ezaguera sakona adieraziz egilearen aldetik.
60 urtera bidean doan irakasle alarguna, haren seme-alabak, berauen bikotekide eta haurrak, bakoitzaren lanbideko gorabehera eta arazoak... sare bat bezala zabalduz doa etengabe eleberria, zabalduz doaz landuriko gaiak eta ukituriko arloak, baina iragaitzaz bakarrik, bizitza aurrera baitoa beti, ez baita inon gelditzen, zain baititu lagun eta ustekabe berriak, beren gazi-gozoekin, beren nahi eta ezinekin.
Urtaroen gurpilarekin batera doa jiratuz nobelaren egitura, munduaren ziklikotasuna iradokiz bezala. Ez dago tesirik ordea, elipsiz jositako kontakizun eder bat baizik, protagonisten izaera ezin hobeto atzematen duena eta sentimendu muturrekoenak ere modu eutsi eta dotorean agertzen dituena. Artistak asmaturiko kristalaren atzetik bizitzaren ikuskizunari begiratuko bagenio legez ; beira gardena izan ordez ispilua izan daiteke ordea, irakurleak bere burua islaturik ikusiko duena...