«Hori dela eta, bakardadearen mamua aldentzeko, aurreko gutun hartan agindutako guztia kontatzera natorkik. Gauza asko jokoan daudenez, inori ezer ez azaltzea eskertuko niake. Agidanean, hi izango haiz sekretu honen gordailuzain bakarra. Berarengatik utzi nian neure ondra, eta, ustez, laster utziko diat bizia. Hiretzat ez diat horrelakorik desiratzen. Gorde itzak, bada, ondra, bizia eta ene sekretua».
Faustoren itzala-k bi hari ditu, elkarren artean etengabe txirikordatzen direnak. Lehenengoa, Joan Jose Elhuyarrek Fausto anaiari Kolonbiatik bidaltzen dizkion gutunek osatzen dute. Hari mutur horri tiraka, Elhuyartarren sekretuarekin ez ezik, garai hartako giroarekin ere topo egingo du irakurleak. Ilustrazioa, erromantizismoaren hastapenak, Inkisizioa, masoneria, Ameriketako herrien indenpendentzia gogo ernaldu berria... Bigarren haria, berriz, gure egunetan Ipar Europatik Euskal Herrira etorritako gazte baten istorioa da. Gazte horrek Upsalako Unibertsitatean noizbait galdu ziren Elhuyarren gutunak aurkitu eta hona ekarri ditu. Bere peripeziaren berri berak grabatutako bideoen bitartez ematen digu.