Orain dela ia mende erdi bat jaio zenetik, era askotako alorrak landu izan ditu Errenteriako Ereintza elkarteak, bai kirol munduan eta baita kulturgintzan ere.
Diktaduraren garaian, esaterako, ipar-orratzaren antzekoa zen Ereintzaren eskutik eginiko lana. Herriko jaietan euskara itsastea, euskal folklorea suspertzea,
bertsolaritza garatzea, literatura pizteko lehiaketak antolatzea, euskal antzerkiari eustea, Gabon eta Santa Ageda jaietako ospakizunak biziberritzea...
Ereintzari eskerrak berreskuratu zen Errenterian galdu samartua zen Santa Ageda bezperan koplak kantatzeko ohitura. Azken hirurogeigarren hamarkadaz geroztik, tinko eutsi dio, ia hutsik egin gabe, koplak kalez kale, eta tabernaz taberna, kantatzeari. Josetxo Oliveriren zuzendari lana, Kosme Lizaso bertsolariaren ekarria eta, bertsoak hainbeste urtetan prestatzen, Sabin Irastortzak burututako lana isila erabakigarriak izan dira Santa Ageda koruaren garapen eta bilakaeran. Bihoakie guztien esker ona.