Gizakiak historiaurretik gaurdaino egin dituen eskultura sorkariak, euskal kultura eta artearen ondare aberatsaren baitan, atzeman eta uki daitezkeen errealitate materialak dira. Gizaldiak unibertso plastiko guztiz heterogeneo eta ugari bat sortu du iraganetik bertatik, eta sortzen dihardu oraindik ere, historiaren bilakaeraren arabera.
Errealitate hau kontuan izanik, liburu honek gogoeta bat egiten du eskulturagintzak denboran zehar egin duen ibilbideaz, euskal eskultura modu erraz batean ulertzen laguntzen duten hainbat obra sail edota mugarri artistiko aztertuz eta interpretatuz; hau da, euskal eskulturaren ibilbide sintetiko bat aurkezten da hemen, orain eta beti, gure ingurune hurbilenean txertatzen eta eguneroko errealitate gisa finkatzen diren proposamen eskultoriko horietara hurbiltzen dena.