Anfetamiña bere lehen liburutik hasita, argitaratu gabeko Udazkena Berlinen poema-sortaraino, ia hogei urtez luzatzen den ibilbide poetikoa jasotzen du Bingo honek. Montoiak sekula argitara eman gabeko poemez gain, aspaldi argitaraturikoak ere agertzen dira bilduma honetan, baina liburua txit berria dela esan daiteke, berridatziak ageri baitira bertan aspaldi argitaraturiko gehientsuak, jatorrizko argitalpenetan izandako huts eta akatsak nahiz poetak berak eginikoak nolabait zuzendu nahian, liburuaren nondik norakoa zehazten duen atariko sonetoan Montoiak berak aitortzen duen bezala.