Jon Mirande-ren « Haur besoetakoa » liburuaren berrargitaratzea dela-ta zenbait zehaztasun labur adieraztea gustatuko litzaiguke orain. Betidanik Jon Mirande-ren « Haur besoetakoa », aipatzerakoan, Nabokov-en « Lolita » nobela famatuarekin izan da gonparatua, ene ustez, euskaldunaren kalterako. Lau urtetako diferentziarekin idatziak izan baziren ere, Mirandek berak aitortu zigun ez zuela « Lolita » ezagutzen bere liburua idazterakoan eta sinisten diogu errazki, zeren pedofiliaren mundua literaturgintzaren hastapenetatik deskribatua izan baita, bere goi maila klasikoen garaiean lortzen zuelarik.
Eta, aitzitik, Jon Mirande Nabokov-ekin gonparatu behar baldin bada ez da bakarrik izango Theresak eta Lolitak duten antzarengatik soilik, idazle hauen liburuetan agertzen diren beste ezaugarri batzu direla medio baizik: alkoholaren mundua, protagonistak neskatoarekiko duen bildumatzaile-joeragatik...
« Haur besoetakoa » liburuan Mirandek euskal literaturan orain arte ukitu ez diren gaien erakustegi berri bat zabaltzen digu gure begien aurrera (kontutan hartzekoa da Mirandek lan bau 1959an bukatu zuela), inoiz ikusi ez den argitasun edota deskribatzeko halako era gordin eta bizi batez.