Opiaren Nazioarteko Batzordea izan zen drogak kontrolatzeko nazioarteko lehen bilera. 1909an egin zuten, Shanghain. Ordutik, debeku eta jazarpen politikak nagusitu dira nazioartean, drogek baino kalte gehiago sortu dituen gerra batean. Nazioarteko erakunde ofizialak ere hasi dira hori onartzen.
NBEk drogen inguruan martxoan egin zuen goi bileran, "kalteen murrizketa" kontzeptua drogen aurkako politiketan txertatzeko ahalegina egin zuten 26 herrialdek. Hegoak elkarteak 15 urte bete ditu xede horrekin.
Drogen inguruan iritzi propioa osatzekotan, ahalik eta informazio gehien behar dugu. informazio hori, ordea, lausotuta edo desitxuratuta heldu ohi zaigu, iristen zaigunean. Ia inoiz ez zaigu ailegatzen, esaterako, kapitalismoaren eta drogen arteko lotura estuen inguruko informaziorik.