Otxarkoaga auzoa Bilboko etxebizitza arazoaren ondorioz eraiki zuten, duela mende erdi. Bizkaiko hiriburuko ehunka mila txabolistaren errealitatea ezkutatzeko bide bat izan zen. Iragan horren "benetako historia" berreskuratzeko lanean ari dira auzokoak. Dokumental bat ari dira prestatzen urte bukaerarako, Francoren propagandaren eragina ezabatzeko.
Duela mende erdi, Larrialdi Sozialerako Plana jarri zuten martxan Bizkaian, bertako etxebizitzaren arazoari aurre egin nahian, eta Bilbon Otxarkoaga auzoa jaio zen. Frankismo garaia zen. Jaiotza hori desitxuratzeko orduko eta egungo saioei aurre egin nahian ari da Otxarkoagako Familien Elkartea.
Txabolatan bizitako Otxarkoagako jendea etxe berrietara eraman ondoren nola bizi zen ikusteko Francore Etxebizitza Ministerioak dokumental bat eman zuen. Propaganda lan haren aurkako dokumentala ari dira prestatzen Otxarkoagan, AFO Otxarkoagako Familia Elkarteak bultzatuta.
Santanderren jaio zen, baina bizitza guztia egin du Cristina Condek (1930) Bilbon. Bertan ezkondu eta bost seme-alaba izan ditu. Lehenik, senarrak egindako txabola izan zuen bizilekua, frankistek bota zuten arte.