XIX. mendean, goierritar gehienak nekazaritzatik bizi ziren. 1833-1876 urteetan, karlista eta liberalen arteko gerrak Euskal Herriaren ekonomia egoera larrian utzi zuen. 1841ean Madrilgo gobernu liberalak aduanak Ebrotik Bidasoara pasa zituen eta aldaketa horrek eragin handia izan zuen barne merkatuan. Espainiako garraiobideak orokorrean oso atzeratuak zeuden eta berritzeari ekin zioten. 1856an Malkaskotik (Ordizia) Lizarrustirako (Ataun) errepidea egin zuten eta, urte batzuk geroago, Segura-Zegama-Otzaurteko errepidea. Honela, Goierri eta Nafarroaren arteko harremanak erraztu egin zituzten.