Euskal Herriaren Adiskideen Elkarteak (EHAA-RSBAP) antolatuta Azkoitiko (Gipuzkoa) Insausti jauregian Ilustrazioari buruz egindako nazioarteko jardunaldietako bost hitzaldi biltzen dituen liburua kaleratu du Erroteta argitaletxeak, EHAA-RSBAPen laguntzaz, Ilustrazioa, Ilustrazioak izenburuarekin. Iaz egin ziren jardunaldiak, azaroaren 14tik 17ra bitarte. Jon Sudupe, Iñaki Aldekoa, Jose Ramon Zubiaur, Iñaki Zabaleta eta Luis Mari Mujika dira hitzaldien egileak.
Ilustrazioaren kriseilupean da Jon Suduperen hitzaldiaren izenburua, eta hiru ataletan banatua dago: Argien mendea, Garai ilunak eta Etorkizun itxaropentsua.
Iñaki Aldekoak Ilustrazioaren eragina euskal literaturan du aztergai bere lanean, eta batez ere Juan Antonio Mogelen Peru Abarka aipatzen du.
Jose Ramon Zubiaurrek Hizkuntzalaritza Euskal Herrian XVIII. mendean aztertu du. Lanaren amaieran egiten duen laburpenean dio Manuel Larramendi «euskara moderno eta jantziaren sortzailea» izan zela.
Iñaki Zabaletaren lanak Euskaldunak Wilhelm von Humboldt-en begietan du izenburu eta Luis Mari Mujikak XVIII. mendeko herri lirika du aztergai.