Bi pertsonai nagusien kontra-jarpena da Peru Abarkako motorra eta horren inguruan harilkatzen dira elkarrizketa guztiak. Hasera batean antagonismo hutsa dirudi eta kontrajarpen soila, baina liburuan aurrera egin ahala ñabarduraz beterik dago antagonismoa han eta hemen Mogelen begiradan ironia nabari den heinean.
Behin eta berriro, esaten du Peruk, bera eskolagabea dela, baina ez du horrekin esan nahi inorantea denik edo basapiztia, alderantziz "eskolagabea" dela adieraztean baserriko eskola -naturaren jakinduria- errebindikatzen du. Natura ez da zerbait neutroa, aitzitik ikasbide eta jakituriaren iturburua da. Rousseauren antzera Mogelek ere gizonaren kalteak bere "heziketan" ikusten ditu, baina ez da edozein heziketan, aitzitik kaleko eskoletan ematen den ikasbide okerrak makulaturiko heziketan.