Harkaitz Canok gazterik idatzi zuen bere lehendabiziko nobela hau, hogei urterekin. "Kea behelainopean bezala" poema liburuarekin aurrena eta "Beluna jazz" honekin ondoren, idazle apartaren estilo berezkoa eta dirdiratsua agerian geratu ziren.
Bob Ieregi tronpetajolea duzu protagonista, Kentuckyko euskaldun baten semea, Ameriketarik alde egin eta Rotterdameko Beluna Moon klubean jotzen aritu zena. Taberna hartako ateak errebolber baten danborraren antzera egiten zuen bira ; eleberri beltzetan bezala. Zorigaiztoz, ordea, orain Alaska psikiatrikoan gatibu dago Bob Ieregi, eta handik ihesi beharra dauka nola edo hala.
Jazz kontzertu baten moduan eraikitako kontakizun honetako doinuek errealitatetik ametsera eramango zaituzte, eta ametsetik tronpetajolearen zorabiora. Giro surreal eta miragarri horretan askatu ditu nobelagileak Bob Ieregren ibilerak. "Badakit tronpeta jotzen onenetakoa naizela, baina tipo korriente bat besterik ez naiz, zigarroak erre eta poteko tomatean ogia bustitzea gustatzen zaiona".