Eskutitz egitura jarraitzen duen eleberri labur honek 12 urteko Sylvain gaztetxoaren gorabeherak jasotzen ditu. Sylvainek maitasuna ezagutu berri du eta harekin batera egonezina, alaitasuna, euforia, zalantza, nahasmendua eta baita krisia ere. Heldua sentituz, erabakiak hartzeko gai sentitzen da eta guztia eskutitzaren bitartez adierazten die etxekoei : bereziki, etxetik alde egin eta maitatzen duen neskaren etxean bizitzen jarri izana. Sylvainek ederki justifikatzen ditu adierazpenak, zuzenak eta sakonak, batzuetan baita gogorrak ere. Helduen mundua imitatzen saiatzen da, nahiz eta 12 urteko inozentzia agerian gelditu. Hori dela eta, ezjakintasunak bultzatuta, Sylvain nerabezaroaren inguruko azalpenak aurkitzen saiatzen da bizitzen duenari erantzuna aurkitzeko eta bere burua lasaitzeko. Hainbat sentimendu agerian gelditzen dira, horien artean errudunarena. Tonu hurbilean, agian apur bat sarkastikoan idatzita, erraz irakurtzekoa da. Euskara erraza eta ongi ulertzekoa da.