Joxemari Mendizabalek (Aduna, Gipuzkoa, 1947-2010) ilusio handia zuen herenegungo desafioarekin. Urtebete zen aizkoran berriro hasi zela. Hogei urtez plazetatik kanpo egon ostean, lanetik erretiroa hartu ondoren, 62 urterekin, hasi zen berriro entrenatzen. Zenbait erakustaldi egin zituen aurretik, baina igandekoa zuen aizkorara itzultzeko eguna. Itzulera eguna, baina, betiko agurraren eguna bihurtu zen. Apustuei lotuta egin zuen bere kirol ibilbidea, eta bide beretik esan zuen agur.