1. Lunar Reconnaissance Orbiter (LRO) ontziak urtebetetik gora darama Ilargiaren mapa topografikoa egiten, baita irudi eta datu mordoa biltzen ere. Satelitea ezagutzea da helburua; besteak beste, gizakia hara itzul dadin.
2. Ez dute biharko aurreikusten, baina hamarkada gutxian, gizakiak Ilargian base egonkor bat izateko aukerak ez dira gutxi. Are gehiago, LROk berarekin zeraman LCROSS modulua Ilargiaren krater batera jaurti eta talkak altxatutako hondakinetan ura atzeman dutenetik. Ur hori nola prozesatu asmatuz gero, Ilargiraino ura garraiatzeko ahalegin itzela aurreztuko litzateke...
3. Krater, mendi, zulo... Neurketa zehatzak egitearekin batera, argazkiak ere atera ditu urte honetan LRO zundak. Informazio ugari emateaz gain, zehaztasun handiko argazkiok gure satelitearen irudi ezin ederragoak ere ekarri dizkigute.
4. Oraindik ere bada gizakia Ilargira ez dela iritsi dioenik. Eta gauza bera esaten jarraituko dute, nahiz eta LROk ateratako argazkietan, esaterako, Apolo 11 ontziak lur hartutako tokia ikusi.