Eskuartean duzun liburu hau, ez da euskal izenen zerrenda huts bat. Bertan, euskal izenen jatorriari buruz hamaika xehetasun aurkituko dituzu : nondik sortuak diren, nork eta noiz erabili zituen, zer esan nahi duten, nolako bilakera izan duten... Izen bakoitzaren atzean hainbat historia, hainbat pasadizo eta hainbat elezahar edo kondaira ezkuturik daude, eta horiek guztiak azaldu, argitu eta ezagutzera eman nahi izan dizkizuegu, egindako ahalegin horrek zuen jakinmina asetzen lagunduko duen itxaropenean. Euskal izen baten bila dabilen horrek, beraz, garai eta jatorri askotarikoak aurkituko ditu: batzuk euskal mitologiatik hartuak, beste batzuk erdi aroko testuetatik jasoak; S. Aranak euskaratuak ere badira mordoxka, eta jakina, ugariak dira euskararen baitatik azken urteotan sortuak. Bainan denek izan dute tokia eta lekua lan honetan, denek baitute euskal izenen zerrendan egoteko eskubidea.