Hiru ipuinek osatzen dute Harri barruko bihotz-borrokak, lotura estua duten hiru istoriok, pertsonaiak eta gertaerak batetik bestera igarotzen baitira, ikuspegiak aldaturik. Abesteko gogoa galdu duen kantautore baten ezinegona ageri da "Bihotza galdu zait" kontakizunean; etorkizun handiko ziklista baten zalantzak eta borrokak dira kontagai "Barruan daukadan guztia" ipuinean; torturaren atzaparkadak bere larruan nozitutako neska gazte bat topatuko dugu "Harri kozkor bat naiz" istorioan. Elkarri hari finez jositako hiru ipuin, arin irakurtzen direnak baina gogoan geratzen zaizkizunak; izan ere, euskal gizarteko erretratu bat eskeintzeaz gain, nonahi eta noiznahiko gazteen kezkak dira liburuan agertzen direnak: amodioa eta sexu-harremanak, adiskidetasuna eta konpromisoa, norberaren nortasuna eta hori finkatzeko borrokak.