Euskal Herrian ez ezik, nazioartean ere izango du oihartzuna ostiralean ospatuko den Euskararen Egunak. Izan ere, euskal hiztunak mundu osoan daude; 25 unibertsitatetan irakasten da euskara, eta proiektua martxan hasi zenetik, 5700 lagunek parte hartu dute.
1. Etxetik milaka kilometrotara eta zero azpiko tenperaturetan egon arren, berotasuna topatu du Leire Ordunak Moskuko Unibertsitatean. Errusiera ikasi nahi zuen, eta, horregatik, Moskura joatea erabaki zuen. Ikasi eta irakatsi, biak egiten ditu orain Moskun. Errusiera ikasteaz gainera, euskarako klaseak ematen baititu, Moskuko Lomonosov Unibertsitatean eta Cervantes Institutuan.
2. Euskara irakasle sekula izan gabekoa zen Gorka Larrañaga Mexikora heldu zenean, orain bost urte. Paisaiaz aldatzeko gogotsu zebilen herrialde hartara joateko aukera suertatu zitzaionean, eta graduondo batean sartzea lortu zuen han, hasita zeukan arte ederretako ikerketa proiektuaren bitartez. Han zegoela jaso zuen Eusko Jaurlaritzaren irakurle programaren berri, eta lau urte darama jada Mexiko Hiriko Iberoamerikar Unibertsitatean euskara irakasten.
3. «Ez zen nire helburua atzerrira joatea, baina biziak hona ekarri nau», dio Ainara Maia irundarrak. 2008ko maiatzean jaso zuen Eusko Jaurlaritzako Kultura Sailetik Txekiako Brno hirian euskara irakurle gisa joateko eskaintza. Hasieran zalantza asko izan bazituen ere, eskaintza onartu, eta Euskal Herrian dena utzita abiatu zen Txekiar Errepublikara.