Madalenek harrituta aditu zituen bere maistraren hitzak. Harekin ikasitako guztia egunen eta urtaroen iragaitea bezain naturala iruditzen zitzaion. Sekula ez zen ezberdin sentitu beste nesken artean.
- Orduan...-duda egin zuen, galdetu ez galdetu-, sorginak al gara?
Andra Gailaren eztarriak harrigarrizko barre alai gaztea egin zuen, eta mendi eta haranek herri eta baserrietan oihartzun eginez erantzun zioten. Soinu bitxi hark, milaka kanpaitxoren aldi bereko hotsen parekoak, luzaroan iraun zuen guztien ahotan. Behin entzun zen, urteko gaurik laburrenean, udako solstizioan.