Liburu hau, 1899an Foru Aldundiaren babespean plazaratu zen, 'Comisión Médica de la sociedad Económica Vascongada de los Amigos del País' delakoak bere onespena eman ondoren. Bi atalez osaturik zegoen, lehenengoa gaztelaniaz eta bigarrena -laburragoa- euskaraz.
Gaztelaniazko zatia aipatu 'Comisión' delakoaren txostenaz, Carmelo de Etxegarayren hitzaurreaz, 'Dos palabras al lector' eta hamabi kapituluz osatua zegoen. Euskarazkoa ere, gaztelaniazkoaren itzulpen ez hitzez hitzekoa, laburragoa izanik, hamabi kapitulutan antolaturik dago.
Medikuntzaren eta herriaren zerbitzuan idatzi zuten liburu hau, hots, jende xehea osasun eta garbitasunean hezitzeko asmoan, beren ofizioari esker ondo ezagutzen baitzitzuzten garaiko osasun-egoera publikoa, eta jende xehearen osasun-legeen ezagupide eskasaren ondorioak.
Liburuan ematen ziren aholku eta argibideak jende ez adituak modu onenean ulertzeko asmoari eutsiz, euskara jator eta errazean dago idatzia, aipatzeko eta miresteko izanik oso, hainbat hitz eta kontzeptu itzultzeko nolako esapideak erabili dituzten, eta zer nolako esapideak erabili dituzten, eta zer nolako trebetasuna agertzen duten gaien tajukeran eta antolaketan.