Iñigo Aranbarrik 'Zamaontzia' (Susa) aurkeztuko du, bere hirugarren nobela, datorren astean Larrabetzun, Literaturiaren programazioaren barruan. Zamaontzi bat agertu zen behin Abrako badian, Liberiako banderaduna, 'Serenity Star' izenekoa, kapitainak eta armadoreek abandonatua. Barruan hamalau marinel zeuden, etxetik oso urrun, ontzi herdoilduan gatibu, SOS aldarrika, hilabeteetako soldatak kobratu gabe, herritarrek emandakotik bizi behar zutenak. Akorduan dauka Nereak aitite Mateo eta biak arrainetara irteten zirela motordun txalupa txikian, eta ontzi misteriotsura hurbiltzen zirela, dei egiten ziotela eskifaia lander hari. Hamabigarren kapituluaren hasiera da pasarte hau.