Izenburu batek liburua laburbil dezake, edo beste zentzu bat eman diezaioke, guztiz ulergaitz ere suerta dakioke irakurleari. Kasu honetan, liburuak aipagai duen sasoiaren ondorengoaz ari zaigu, liburua bera ni poetikoaren negutik idatzita baitago. Gabriel Arestiren «joan zen uda / eta negua heldu da» hartu eta buelta eman dio egileak, Zea Maysen kanta baten laguntzaz; dena dela, esan dudan bezala, negualdiko poemak dira liburuan bildu dituenak, eta itxaropen printzak dituen arren, izenburuan bertan dago itxaropen zantzurik handiena, irakurriko duguna iragana dela esaten baitigu.