Santa Engraziren bizia izanen da aurtengo pastoralaren gai nagusia eta honen haritik Santa Grazi herriaren etorburua. Soldado erromanoek Santa Engrazi portugesa 300. urtearen inguruan hil zuten torturatu ondoan ez baitzituen bere sinesmen giristinoak ukatu nahi. Sainduaren gorputza Zaragozan atxikia izan da eta luzaz ohoratua. Leiendak dio ohoin batzuek apaingarriz estalia zen bere beso bat lapurtu ziotela X. mendean. Zuberora heltzean iturri baten ondoan zegoen haritz baten enborrean behartuak izan omen ziren besoaren gordetzera. Erraten da zezen bat belaunikatzen zitzaiola haritzari une horretan bere adarrak su-garretan jartzen zitzaizkiolarik. Haritza erroturik zen toki hartan eraiki omen zuten XI. mendean Santa Graziko eliza erromanoa. Santutegi hori beilagune famatua bilakatu zen. Santa Graziko eliza 1841ean Monumentu historikoen zerrendan sailkatu zuten.