Noraino uste duzu, Soka, berreskuratuko dutela bien arteko adiskidetasuna Graxik eta Izarok ? Logela berean egin ote dute lo asteburuan ? Kontatuko ote zioten elkarri nirekin egin dutena ? Nor aurreratuko zen ? Zer aurpegi jarriko zuen besteak ? Jode, jode eta jode. Ez dakit zein musikarik, XVIII. mendeko batek uste dut, ehun eta laurogei kilometro , laurogeita hamar joateko eta beste horrenbeste itzultzeko, egin omen zituen oinez, kontzertu bat entzuteko. Neuk ere egingo nituzke, igeltsu eta guzti, hemendik urrun egotearren. Gaur egun erosoagoa da hegazkina hartzea, bai, arrazoi duzu ; gainera, urrunago joan zaitezke horrela. Manu, txorradak esaten hasi zara ; ez zaude ongi. Sagu kantaria sentitzen naiz, itsas txoriaren eta hontzaren begiradapean. Oi, oi, oi... Sagu hegalaria banintz, behintzat...