Ameriketatik Orixe itzuli zenenan (1954) hiru gizon zain ziren Bilbon : Antonio Maria Labaien, Alfontso Irigoien eta 21 urteko Gabriel Aresti gaztea, Euzko-Gogoa aldizkarian bere poema bat lehenengoz argitaratu berri zuena : "Dance dans la prière". Handik aurrera : laudatua, arbuiatua, saritua, zentsuratua, iraindua, miretsia, zokoratua, kantatua... gure kultur memorian leku oso berezi eta garrantzitsua hartzen du Gabriel Arestik. Bere hainbat poema ikur bihurtu dira denontzat, haren hizkuntza ereduak hurrengo belaunaldiak eta euskara bera markatu zituen, bere adimen kementsuak obra mugarri eta zabala utzi digu. Poeta, artikulista, antzerkigile, itzultzaile, hiztegigile, editore... literaturari eskaini zion bizia. "Euskeraren aldean / Armarik eztot artun egingo / Egundo nire eskuetan / Nire plumea nire izerdia / Eskeintzen deutsat benetan" (1959).
Angel Zelaitak aurkezten dizun Gabriel Arestiren biografia hau gida argigarri eta xehetasunez betea duzu idazlearen lana eta bizitza ezagutzeko eta ulertzeko, Arestiren heriotzaren 25. urteurrenean.