Rufino Iraola, batez ere, kasetari bezala da ezaguna, baina narratiba laburrean ere -ZALDIARANGOAK- frogatua du bere prosa literarioak duen bizkortasuna eta grazia. ABARASKA izeneko liburu honetan pentsamenduaren arloari loturik dihardi Zaldibiako idazleak.
ABARASKA erleek erlauntzaren barnean argizariz prestatzen dituzten hexagono formako zulotxoen multzoak osatzen dute. ABARASKAri eztia darion bezala, Rufino Iraolaren liburu honi aforismoen tankeraz jantziriko eztia eta argizaria dario. Giza erlauntzan badira erle nagiak eta erle langileak ; Rufino Iraola erle langilea da, zeren ez du bakarrik argizaria egiten, aitzitik argitu ere egiten du erlauntzako argizari sua itsasiaz.
Iraolaren ABARASKA honi argi izpia dario beti, baina eztiaren alboan listorraren eztenkada ere nabari da inoiz, zeren eztenaz ere egin daiteke argia, sarritan ilunean eta alferkerian dirauen euskal erlauntzaren baitan.