Medikuek ez dakite zergatik, baina udaberrian egun batetik bestera gero eta enara gehiago iristen diren bezala, zeliakoak ere ugaltzen ari dira, nabarmen. Elaia da horietako bat.
Bi urte bete baino lehen diagnostikatu zioten zeliakia, eta ordudanik elikagai batzuk saihestu egin behar ditu ezinbestean. Izan ere, gaixotasun zeliakoak ez du sendabiderik, eta ez da sendatzen, baina badu konponbidea: glutenik gabeko bizitza. Elaiari eskutik helduta, zeliakiaren inguruan sortzen diren zalantzak argituko dizkigu liburu honek: sintomak, diagnostikoa, elikadura, arriskuak eta mugak, kutsadura gurutzatua, glutena duten eta ez duten elikagaien zerrendak, menuak eta gainerakoak.
Gainera, Elaiaren ikastolako lagunentzat ez ezik, hauen gurasoentzat, senideentzat eta irakasleentzat ere informazio baliotsua biltzen du, mundua enaraz beteta baitago.