Liburu honetan egilearen helburua arteak Erdi Aroko Europan izan zuen esanahia azaltzea da, baita gainerako kultura-adierazpenekin eta gizartearekin zituen harremanak erakustea ere. Haren hitzetan, “hasita nengoen neuri buruari galdezka zein lotura dagoen gizarte-egituren eta kulturaren artean, materiala denaren eta materiala ez denaren artean, errealaren eta alegiazkoaren artean”.
Garai hartako arte-obra asko galdu egin dira betiko, baina maisulan garrantzitsuenak gaur arte iritsi zaizkigu. Bikaintasunez beteak daude eta gizarte hartako handitasunaren isla dira. Alabaina, handitasun hori Erdi Aroko gizartearen alderdi bat baino ez da. Izan ere, katedral, jauregi edo monasterio handi haiek basakeria, ankerkeria eta miseria gorrienen estalki finak ere baziren. Dudarik gabe, Erdi Aroa aldi berean handitasun-garaia eta morrontza-garaia izan zen.