OSCAR WILDE (Dublin, 1854) Gaztetan ikasketa bikainak egin ondoren, bere lekua lortu zuen Londresko literatura munduan, saiogile eta olerkari gisa. Hizlari aparta ere izan zen, gizarte viktoriarreko bilera, jai eta afari ugaritan. Estatu Batuetan eta parisen ere lan egin zuen eta bere garaiko idazlerik ospetsuenak ezagutu ahal izan zituen.
Mendearen azken hamarkadan, antzerkigintzan zeharo arrakastatsu zebilenean, Lord Alfred Douglas gazteaz maitemindu zen, eta harreman hark, ibilbide aski laburra egin ondoren, kartzelara bidaliko zuen bi urterako. Ondoren, gizartetik guztiz baztertuta, parisen hilko zen bere bizitzako azken hiru urteak miseriarik gorrienean eman ondoren.
Robert Ross izeneko gaztea izan omen zen, hamazazpi urte besterik ez zuenean, Oscar Wilderen lehen maitale gizonezkoa. Hark bertatik bertara kontatutako bizitza da Oscar eta Sebastian edo Oscar Wilderen bizitza liburua osatzen duen eleberri moduko narrazio hau.