Dendaketan merkataritza arloko profesionalei zuzendutako ikasmateriala da, bezeroekiko harremanetan euskararen erabilera sustatu nahi duena.
OSAGAIAK
Liburu bakarra da Dendaketan. Bertan, sei unitate ditugu ; eta bakoitzak, batez beste, sei eskola-ordutan lantzeko edukiak biltzen ditu. Liburuaren azken atalean glosario bat dago, unitate guztietan agertutako lexikoa batzen duena (euskara-gaztelania eta gaztelania-euskara). Esan gabe doa ikasleentzat oso erabilgarria dela liburu bakarrean jarduerak eta hiztegitxoa edukitzea.
Ikasmaterialetako elkarrizketak liburuari erantsita doan CDan jaso ditugu.
METODOLOGIA
Unitate bakoitzean, taldean nahiz bakarka egiteko jarduerak daude.
Taldean egiteko atazak “Atazetan Oinarritutako Ikaskuntza” eredu metodologikoa abiapuntu hartuta eratu ditugu, saltokietan sortzen diren egoerei erantzuteko asmoz. Ataza horien ardatza, izan ere, saltzailearen eta bezeroaren arteko elkarrizketak dira.
Bakarkako eginkizunak, ordea, lexikoari lotuagoak daude.
Ildo horretan, nork bere kasa burututako lana egiaztatzeko bidea ere badago, ikasleak eskura baititu erantzun zuzenak liburuaren bukaeran.
HELBURUAK
Zerbitzu egokia eskainiko bada, ezinbestekoa da bezeroei euskaraz jarduteko aukera ematea. Beraz, helburu nagusia langileek bezeroekin ahozko euskara erabiltzea dela ere, denda eta saltokietan dagoen ageriko informazioa (errotuluak, eskaintzak, abisuak...) sortzen ikasteko ere bada.
NORENTZAT
Merkataritza esparruan lan egiten duten eta euskara ikasten hasiberriak diren edo hastekotan dabiltzan dendarientzat dugu Dendaketan. Kontuan izanik sei unitate didaktikoz osatua dagoela, euskalduntzearen hasierako hilabeteetan erabiltzeko baino ez da.