Masajeak, fitness-ikastaroak, SPA, era askotako produktu kosmetikoez hornituriko bainugelak... Hori guztia aurki daiteke emakumeentzako hoteletan. Emakume batzuen unibertsoan amestutako luxu guztiak eskainiz, lan-kontuengatik bidaiatu behar dutenei zuzenduta daude.
Europako hiriburu nagusietan aurki daitezke proposamenik modernoenak. Eta urrutira begiratu gabe, Euskadin ere izan da saiakerarik: Donostiako Codina edota Bilboko Abba Parque hotelak, hain zuzen ere, aitzindariak izan dira ahalegin honetan. Duela gutxi, ordea, biek emakumeen solairua kentzea erabaki dute: "bezeroen artean bereizkuntzarik ez egiteko" diote arduradunek. Hortaz, Europan funtzionatzen duen joera honek Euskadin estimazio txikia duela agerian gelditzen da.