Itsaso kontra bat honek sen berberaz erakusten ditu bizitzaren eta amodioaren indarra, eta herio-minak sortutako egonezina. Eta bizitzaren eta herioaren orbainak gozatzeko ahaleginean, sen berberaz bilatzen du sosegua, alegia, edertasunean oreka, liburuan babesa, edo finean, Itsaso kontra bat.
Eta Karmele Igartuak arnasari, puntuazioari, erritmoari eta irudiei jarri ohi dien arreta berberaz, ekarpen berri bat egin du hautatu dituen orri-bazterreko hitzetan. Harridura sortzeko hiztegi eta baliabideen ordez, sentimentalismoa eta konmozioa eragin dezaketen artefaktuen ordez, metafora bidez oinarrizko hiztegia zehaztera jo du. Bizia erasokor datorrenean berbarik eta egoerarik xumeenetan arakatu du bizi gogoa : eta iristu, korapilo, martxoa, hasiera, bukaera, bakarrik, itsas-argi, iruditu, pentsatu... erabili du.
Hitzeran sortu ditu, beraz, geure baitara bilduko eta beste norabaiteko sentiaraziko gaituzten zehaztapenak eta metaforak. Horregatik, orain badakigu azkena atzendu ezina dela, eta Karmele Igartua airezko, betiko.