Garbiñe Insausti hernaniarrak urteak daramatza antzerkigintzan, batera eta bestera bidaiatuz. Horrexegatik jarri omen dio Ibilian izenburua atera berri duen diskoari. Antzezle eta abeslari, beraz. Hondarribiko Hirusta Records diskoetxearen eskutik grabatu du lana, Mikel Errazkin teklatuan eta musika gidaritzapean, eta beste hainbat esperientziadun musikari inguruan: Xabi López gitarretan, Txema Garcés baxuan eta kontrabaxuan eta Igor Telletxea baterian.
2006ko abuztu eta iraila bitarte grabatu zuten hamar abesti dituen diskoa. Abesti lasaiak sortu ditu, pop melodikoa, jazza eta folk amerikarra uztartuz.