1. Ez dakit zerk erakartzen gaituen horren bizi krimenen narrazioetara, gutako edonoren baitan hiltzaile estali bat izan badela susmatzeak edo gogoaren xendra bihurrien irudimen hutsak, baina izan fikzioaren bitartez, izan dokumentazio lanez, ba al da okzidenteko herriotan krimenak adina interes pizten duen gairik? Errealitate tanta batzuekin eta fikzio lurrunekin osatu du Ferdinand Von Schirach abokatuak (Munich, 1964 ) 11 ipuineko bilduma hau, azken urteetan Alemania astindu bide duten eta berak ikertu izan dituen hainbat krimen kontakizun bihurtuz, gizakien bizitzen gorabeherez jardun nahian, dioskunez. [...]
2. Poesia mailu bat dela idatzi zuen Gabriel Arestik. Baita idatzi ere haren maiseatzaileek berea ez zela poesia esango zutela. Zintzo izatera, ez dut egundo ulertu Arestik poesia mailua izatea hobetsi ote zuen. Dena den, haren poesiaren bitartez Jorge Oteiza imajinatu ahal nuen harrien aurka kolpeka, zizelka, harrizko herri hau moldatu nahian. [...]