Gaztelako tropek 1512an Nafarroa inbaditu zuteneko bosgarren mendeurrena aurki izango dela eta, 2011ko irailaren 16, 17 eta 18an Euskal Herriko historialarien II. biltzarra ospatu zen, Nabarraldek antolatuta, Oñatiko Unibertsitatean. Berrehun pertsona baino gehiagoren aurrean, punta-puntako hogei aditu inguruk txostenak eta komunikazioak aurkeztu zituzten. Gai nagusia Arabak, Bizkaiak eta Gipuzkoak 1512ko konkistan izan zuten eginkizuna izan zen, baita lehendik konkistatuta zeuden euskal lurralde hauen eta nafar Estatuaren arteko harreman historikoa ere. Liburu honen bidez, Nafarroaren historian interesa izan dezakeen edozeinen esku uzten ditugu biltzarrean aurkeztutako txosten eta komunikazio guztiak.