Miren Agur Meabek (Lekeitio, 1962) 'Kristalezko begi bat' nobela aurkeztuko du etzi, Susa argitaletxeak kaleratua. Pintoreak autorretratua margotzen duen gisan idatzi du Meabek nobela hau, kristalezko ispilu berezi bati arretaz begira. Errealitatea eta fikzioa josiz eta urratuz sortutako kontakizuna da. Bizitzaren alde mingotsa ezagutu duen emakume baten mintzoa adituko du irakurleak hasieran: begi bat galdu zuen nerabezaroan ; minbiziz hil zitzaion ama ; dibortziatua da eta seme bat dauka ; enkarguzko lanak idaztetik ateratzen du bizibidea ; berriki utzi egin du maite-laguna eta harrezkero gaixotuta dago... Nobelaren hasierakoak dira aurrerapen honetan jasotako bi pasarteak.