Piarres Lafitte Ithurralde Luhuson sortu zen 1901. urtean eta 1985ean hil zen Baionan 84 urte zituela. Gazte-gaztetatik euskaltzale eta abertzale handia izan zen, EAJ alderditik beti gertu ibili zena. 1936ko errefuxiatuak laguntzen ahalegindu zen sutsuki eta Bigarren Gerla Handia izan zelarik erresistentzian buru-belarri aritu zen. Euskararen eta euskal kulturaren aldeko militante gartsua izanki, Iparraldeko aldizkari eta agerkari ia guztietan idatzi zuen. Bere obra nagusia Grammaire basque izenekoa da. Hark idatzi zituen ere Lapurdiko itsas hegian jokatu ziren antzezlan ugari.