Azken hamar urteotan Euskal Autonomi Erkidegoan (EAE) lortutako aurrerapen ekonomikoa nabarmena izan da, bertako biztanleko errentari begiratzen badiogu behintzat. Izan ere, 2008 urte hasiera honetan, EAEko biztanleko errenta Europako batez besteko errentaren gainetik aurkitzen da (% 136 da, hain zuzen), eta datu honek, neurri handi batean lehiakorra den eta ongizate maila altua duen eskualde batean bizi garela adierazten du.