Rinoceronte Editora S.L.U. argitaldari galiziarrak zigilu berria sortu du, haur eta gazteentzako literatur liburuak plazaratzeko xedez. Zigiluak Sushi Books du izena, eta galizieraz ez ezik, euskaraz, katalanez eta gaztelaniaz ere argitaratuko ditu obrak.
Egungo idazle galiziarrak beren lurraldetik at ezagutarazi nahiko lituzke argitaldariak, baita nazioarteko egileak aipatu hizkuntzetara itzuli ere. Sushi Booksek hiru bilduma aurkeztu ditu oraingoz : Albuma –irudidun liburuak, batik bat–, Bitartekoa –Lehen Hezkuntzako irakurleei zuzendua–, eta Aurreratua –haur handiagoentzat aproposagoa–.