Eñaut Etxamendiren bildumaren seigarren eta azken liburua da hau. Hemen dira haren kantuen hitzak eta partiturak baita ere olerki, ohar eta azalpenak. Dena poesia dela haren obran argi da : eleberri, ipuin, kantu ala olerkiak poesiaren hatsak, hobeki erran haizeak, betetzen ditu. Bere herriaren minberatasunaz, desagertze arriskuaz, apurketa ezinbestezkoaz jabetu zenak, "etxea eta euskara" hondatzera zoatzilarik duela 50 urte, deiadar luze eta mingarri bat botatzen du, hemen hain barnetik senditzen ahal dena. Bere idatzien sahetsean, kantu eta olerki hauen argitalpenak burua altxatu zuen Euskal Herri bat erakusten du : gaur bihar bezala, itxaropena zutik egonez eraikiko baita.